L’Asociación

Naide nun entenderá qué ye anguaño la nuesa familia y cuál ye’l conceutu de familia n’Asturies, ensin tener a lo menos una idea de lo que ye la institución xurídica de La Casería asturiana, que foi, dende finales de la Edá Media, una unidá d’esplotación familiar de la tierra, encadarmada alredor d’esi grupu social que ye la familia; un grupu social estructuráu troncalmente, a semeyanza de lo que pasa en tola fastera septentrional de la Península Ibérica y n’otres zones d’Europa: Gran Bretaña, Irlanda, la Bretaña francesa. Anguaño, les condiciones socioeconómiques son dafecho estremaes, pero con too y con ello, la nuesa familia permaneció en bona midida venceyada alredor d’una cierta unidá d’esplotación familiar de calter comercial ya industrial.

Poro, cola fin de caltener viva esa voluntá d’indivisibilidá y permanencia nel tiempu del grupu familiar, mirando asina d’evitar la previsible desestructuración de la nuesa familia y l’esvenceyamientu d’ella de les vinientes xeneraciones, ficimos una revisión y puesta al día de la vieya institución de la casería -símbolu d’esa unidá familiar-, dándo-y un conteníu que permitiera la so permanencia y proyeición futures.

Cola constitución d’esta Asociación, somos quién pa facer realidá esa voluntá de los nuesos mayores. Y creamos, al empar, un espaciu d’ociu y esfrute -la casa-, venceyáu a una cierta actividá de calter socio-cultural. Una puesta al día de lo que ye y significa la casería. Nun se trata sólo d’esfrutar la casa. Esa actividá socio-cultural persabémosla esencial, porque ella será la que mos asegure un proyeutu común que mos permita caltener la continuidá les relaciones familiares ente les futures xeneraciones de la nuesa familia y la caltenencia de la casa familiar como referencia: un llugar d’alcuentru y símbolu de concordia.

L’inmueble aú s’afaya la sé l’Asociación ye la nuesa casa familiar de Sinariego. Cola fin de poder esfrutala de forma ordenao, afitóse un réxime d’aprovechamientu por turnos de la casa, conforme a unes normes que regulen derechos y obligaciones.

L’Asociación mira polos gastos, conservación y meyora, tanto de la propia casa como de les finques, financiándose al traviés de la xestión del so propiu patrimoniu, de les cuotes sociales periódiques y d’ayudes, sovenciones o donaciones públiques o privaes a les que seya quién p’acceder. Naz con una nidia vocación benéfica y cultural. Sicasí, un encontu importante de l’actividá la nuesa Asociación ye la puesta en práutica de l’exemplu de quien supo siempre –y asina mos lo enseñó a toos- que la solidaridá pue facese realidá nel día a día y al traviés de fechos concretos.

D’acordies colos fines afitaos nos nuesos Estatutos,l’Asociación desendolca una serie d’actividaes al traviés de dellos programes:

1.- Programa RAIGAÑOS: investigación y archivu familiar.
2.- Programa ERBÍES: ayudes «Consuelo del Río» al Desarrollu.
3.- Programa SINARIEGO: relaiciones cola Alministración y Comisión de festeyos.