Apellíos de la Familia Del Río

¿Cuál ye l’escudu del mio apellíu?… ¿cuántes vegaes nun mos habremos fecho esta pregunta?. En realidá, los apellíos nun tienen escudos d’armes, porque éstos correspuenden a les families. Nun ye correcho falar del escudu d’un apellíu.

Los escudos heráldicos, tal como los conocemos anguaño, nacen n’Ocidente a principios del sieglu XII. Nún primer momentu son sólo de calter personal, pero al poco pasarán a ser hereditarios, siendo usaos polos miembros de la mesma familia. Poro, puede pasar que persones que tienen un mesmu apellíu y nun pertenezan a una mesma familia, tengan escudos d’armes distintos y, por embargu, miembros d’un mesmu llinaxe, que por estremaes circunstancies tomaron nel pasáu distintos apellíos, tengan idénticu escudu d’armes.

Cuando mos averamos a la xenealoxía y la heráldica (ciencies ausiliares de la hestoria), hemos tener perclaro qu’una cosa ye l’escudu o les armes d’un llinaxe y otro mui diferente suponer qu’esi escudu-y correspuende a un apellíu. Na nuesa familia, d’aniciu campesín, que sepamos nun somos nin fuimos nunca nobles nin fidalgos y, poro, nun podremos nunca pretender usar un escudu pol solu fechu de qu’esi escudu se correspuenda con un apellíu, porque cada escudu (tamién conocíu como blasón o armes) pertenez namái qu’a un llinaxe determináu y específicu. Esto ye, l’escudu pertenez a una sola y concreta rama familiar d’un apellíu, non al apellíu en sí. Si ún nun ye descendiente direutu d’esi concretu llinaxe familiar, nun tien nin siquier el derechu d’usar les Armes (l’escudu d’armes) que-y fuera concedíu a esa familia concreta al traviés del oportunu espediente de nobleza o fidalguía. Poro, tamién hai apellíos de los que nun se conoz llinaxe dalgún al que se-y atribuyera un escudu d’armes: nun tolos apellíos tienen un llinaxe con escudu d’armes.

Lo normal ye que mos atopemos con delles cases pa un mesmu apellíu, esto ye, dellos “llinaxes” estremaos d’un mesmu apellíu. Pero la cosa pue complicase más entá, porque abondes vegaes, yera vezu que les fíes heredaren les tierres y, al casar, yeren los homes los que diben a vivir al pueblu d’elles; la llei del “mayorazu” nun ye absoluta y menos n’Astuies, onde les fíes podíen perfeutamente “casar en casa” y heredar la casería, colos mesmos derechos que los homes; yera una custión más económica -caltenencia de la casería- qu’otra cosa. Tamién pasa qu’a vegaes los homes camudaben el so primer apellíu del padre pol de la madre, si heredaben un mayorazu de la madre: asina, topamos hermanos col primer apellíu distintu.

Sicasí, y falando en términos heráldicos y non xurídicos, el llinaxe tresmítese vía agnada, esto ye, de padre a fíu varón; por encambiu, l’apellíu tresmítese tanto a varones como a femes; y considérase que formen la familia aquelles persones que componen una unidá familiar fasta la tercer xeneración (güelos, fíos y nietos), incluyíos los esposos o esposes de la primer y segunda xeneraciones. Les muyeres hereden les armes del padre, mesmo que’l varón, pero nun les tresmiten a los sos fíos; estos fíos heredarán les armes de so padre (nuevu llinaxe) y, tolo más, podríen usar les armes maternes nel segundu cuartel del so blasón. La llexislación heráldica española reserva de manera terminante y esclusiva la certificación y atribución d’armes únicamente a los nomaos Reis d’Armes, que son les persones encargaes pol Ministeriu de Xusticia pa facelo. Hai quien cuida que ye dable crear y “adoptar” un escudu d’armes pa usalu como se tenga por comeniente, siempre que nun se plaxen les armes d’un escudu yá esistente, correspondiente a un determináu llinaxe; pero pa que esi nuevu escudu se considere como tal en términos heráldicos, tendría de ser certificáu por un Rei d’Armes. Otramiente esi nuevu diseñu, quedaría namás qu’en logotipo o marca d’una familia, pero nunca nun sedría oficialmente un escudu d’armes.

Poro, nun hai blasones que correspuendan a tou un apellíu; los escudos d’armes sólo pertenecen a aquelles families y estirpes que’l Rei declara xurídicamente nobles, ensin que tolos demás parientes col mesmu apellíu, anque sían collaterales, seyan quién pa usar eses armes y, muncho menos, timbrales col yelmu de caballeros. Poro, los escudos o emblemes podríen sabese como curiosidá y vía p’afondar nel estudiu la Hestoria; y podríen usase incluso a títulu particular si se quier por quien comparta apellíu, pero ensin aquellos detalles que son esclusivos de la condición de fidalguía, esto ye: la forma l’escudu, el yelmu y los sos accesorios (cimera de penachu y llambrequinos).

Teniendo claro tolo anterior, l’averamientu que facemos equí a esta custión, nun persigue otro que mirar de satisfacer la natural curiosidá qu’esti tema despierta en bien de xente. Como yá indicamos -y salvo futures y más fondes investigaciones xenealóxiques que pudieran aportar dalgunos datos nuevos-, la nuesa familia ye d’aniciu campesín, polo que la mayoría los escudos qu’equí se representen seique nun corresponderán a los llinaxes de los que procedemos; eso sí, miramos d’asitiar tolos apellíos y los escudos nel llugar xeográficu que-yos correspuende, nos conceyos orixinarios de los nuesos antepasaos (unos de Llanes y otros d’Ayer). Prestaríanos qu’esta información valiera p’averar a toos al esfrute que supón l’estudiu de la hestoria, al respetu y a la conocencia de la cultura propio.
__________________
MÁS INFORMACIÓN:
Apellíos: Aspeutos xurídicos. Filiación. Materia rexistral.